BMJ Global Health માં પ્રકાશિત તાજેતરના મોડેલિંગ અભ્યાસ અનુસાર, ભારતમાં દર વર્ષે લગભગ 51 લાખ ચિકનગુનિયા ચેપ થઈ શકે છે. આ અંદાજ બતાવે છે કે ભારત દુનિયામાં આ રોગથી સૌથી વધુ પ્રભાવિત દેશોમાંનું એક બની શકે છે.

વૈશ્વિક સ્તરે દર વર્ષે લગભગ 1.44 કરોડ કેસો થઈ શકે છે. જેમાંથી લગભગ 48 ટકા બોજ ભારત અને બ્રાઝિલને સહન કરવો પડશે. અભ્યાસ મુજબ, ચિકનગુનિયા માત્ર તાવ અને સાંધાના દુખાવાથી સીમિત નથી, પરંતુ લગભગ અડધા કેસોમાં લાંબા ગાળાનો દુખાવો અથવા વિકલાંગતા થઈ શકે છે.

આ જોખમ માત્ર ઉષ્ણકટિબંધીય પ્રદેશો સુધી મર્યાદિત નથી. Aedes aegypti અને Aedes albopictus મચ્છરો મારફતે ફેલાતો આ વાયરસ બદલાતી હવામાન પરિસ્થિતિઓને કારણે નવા વિસ્તારોમાં પણ ફેલાઈ શકે છે.

હાલમાં ચિકનગુનિયા માટે કોઈ ખાસ દવા કે એન્ટી-વાયરલ સારવાર ઉપલબ્ધ નથી. સારવાર ફક્ત લક્ષણો પર નિયંત્રણ પૂરતી મર્યાદિત છે. કેટલાક દેશોમાં પ્રિવેન્ટિવ રસી ને મર્યાદિત ઉપયોગ માટે મંજૂરી મળી છે, પરંતુ વ્યાપક સ્તરે તેનો ઉપયોગ હજી શક્ય નથી.

અભ્યાસ સૂચવે છે કે જો સમયસર પગલાં ન લેવાય તો ભારતની આરોગ્ય વ્યવસ્થા પર ભારે દબાણ પડી શકે છે. ખાસ કરીને 10 વર્ષથી ઓછા બાળકો અને વૃદ્ધો સૌથી વધુ જોખમમાં છે. તેથી રોકથામ અને રસીની યોજના તાત્કાલિક જરૂરી છે.